बघेली लोकगीत डग्गा तिनताला गीत Bagheli Lokgeet Dagga Teentaal Geet

 खड़ा डग्गा गीत

महाराजा हो खोला केमार / बघेली गीत

महाराजा हो खोला केमार

भींजइ कुसुम रंग चुनर

अरे ठाढ़ी रही तो भीजइ चुनरिया

लौटउं तौ टूटे सनेह

राजा खोलउ केमार

भींजइं हमारी चुनरिया

कोउ सखिया रसिया देअ हो बताय / बघेली गीत

कोउ सखिया रसिया देअ हो बताय

नेहा लगाय के चला गा

ये कोने बरने ओखे घोड़े छयल के

है कउन बरनि असवारि रसिया

नेहा लगाय के चला गा

हंसा बरनि आंखें घोड़ा छयल के

है पातार असवार रसिया

नेहा लगाय के चला गा

अरे हरे रंग रतनारे चौक का

है सुअना रंगीला कोउ देअ हो बताय

डग्गा तिनताला गीत

अरे कुंअना तौ संतन की / बघेली डग्गा तिनताला गीत

 

अरे कुंअना तौ संतन की कौनउ मरै सुघर पनिहार
अरे सांकर मुख बावली कि सिढ़िया रतन जड़ाव
उतर के पानी पिउ लेउ कि जिउ की जलन जुड़ाय
अरे कुंअना तो संतन की कोनउ भरै सुघर पनिहारि

 

कटारिया दै देत्या हो / बघेली डग्गा तिनताला गीत

 

कटारिया दै दैत्या हो मैं मारउँ सवत पर पेट
अरे आधी कटारी बारूमा धंसि गै आधी पिया कै सेज
कटारिया दै दैत्या बलमा मैं मारउँ सवत पर पेट

 

नजरिया जोरे जुरै चित फोरे / बघेली डग्गा तिनताला गीत

 

नजरिया जोरे जुरै चित फोरे बड़ा दुःख होय
अरे ओ प्यारे तोरे कारने कि होइ चिल्हिया मड़रांव
कहौ तो छतिया लगि रहौ कि लै उड़ि जाउँ अकाश
नजरिया जोरे जुरै चित फोरे बड़ा दुःख होय

 

कुंअना पै पानी भरै लिलिया वाली / बघेली डग्गा तिनताला गीत

 

कुंअना पै पानी भरै लिलिया वाली भऊजी हमार
कारी सारी ना पहिरौं प्यारी कारी लौंग ना खांव
कारे बलम संग ना जइहाँ कि मैं कारी व्हइ जाउं
कुंअना पै पानी भरइ लिलिया वाली भउजी हमार

 

 

नम्बू लगायो चहकने का / बघेली डग्गा तिनताला गीत

 

नम्बू लगायो चहकने का
रस लइगा भंवरवा अपने का

राजा जनक के द्वारे मचलि रहे
मचलि रहे चारों भाई हो - जनक के

कौने का लाल कउने का लाल
बजावइ मुरलिया- कउने का लाल

कबै होई हो कब होई भेट नये राजा से
बजरिये मा हो बजरिये मा होई भेट नये राजा से
भंवरा लोभी रे फुलवरिया न छोड़े लोभी रे
गंगा नहाय कपिल दिहे दान
ढिलाव धरम कै जून चिरैया

जेखे सुन्दर रूप नैना लगे रघुवर से
दिन बिसरै न रात गौरा तोरी झुलनिया

 

 

संमला मोरी गली व्है के आव / बघेली डग्गा तिनताला गीत

 

समला मोरी गली व्है के आव
तोरी प्रीति के लाने समला मैं भयउं बरेजे का पान
कली कली मैं तोही खोंटि खवायउं तऊ न मानिसि कान
संमला मोरी गली व्है के आव
तोरी प्रीति के लाने संमला मोर सूखा जात शरीर
ये एक सूखी अंखियां बाउर कि भरि भरि आवइ नीर
संमला मोरी गली व्है के आव

 

 

मालिनि तोरी चाल सालैइ करेजा मोरे / बघेली डग्गा तिनताला गीत

 

मालिनि तोरी चाल सालैइ करेजा मोरे
एक तौ नयन रतनारे नितै कजरारे
कजरिउ मारैइ कटार
प्यारे महार मन लैइ गे
मालिनि तोरी चाल सालइ करेजा मोरे
एक तौ नजर गई बाग मा
कली खोसे कान मा बीरा दाबे गाल मा
बतीसी रची दांत मां
मालिनि तेारी चाल सालैइ करेजा मोरे

 

 

साजन केर अवन्ती सुनि कै / बघेली डग्गा तिनताला गीत

 

साजन केर अवन्ती सुनि कै मोरे रउरे ए हां
मैं जिव्हिया राख्यों बिछाय।
ई गौं गौं पांव धरेउ मोरे सजना
मोरी जिव्हिया दरद ना होय
अरे साजा कहि आवा हां सजन अरे कहि आवा
या जिव्हिया जरि जाय हो साजा अरे कहि आवा
अरे अइहैं धौ कउन महिनवा हमार पिया
अइहैं धौ कउन महिनवा सु मोर पिया
अरे चारी महीना गरम रितु आई
चोलिया चुवै पसिनवा सु मोर पिया
अइहैं धौ कउन महिनवा सु मोर पिया
चारी महीना वर्षा रितु आई रे
ठाढ़े भीजउ अंगनवा सु मोर पिया
अइहैं धौ कउन महिनवा सु मोर पिया
अरे चारि महीनवा शरद रितु आई
थर थर कांपै शरिरवा सु मोर पिया
अइहैं धौ कउन महिनवा सु मोर पिया
आवइं धौ कउन महिनवा सु मोर पिया।

 

 

मैं खेरे कै दुबिया मोरे साजन / बघेली डग्गा तिनताला गीत

 

मैं खेरे कै दुबिया मोरे साजन हां
कि मैं खेर छोउि़ कहां जाऊं
ओही गली मोर सजना अइहीं
मैं चरन रहिउं लपटाय

 

 

भइउं न ब्रज केर मोरा / बघेली डग्गा तिनताला गीत

 

भइउं न ब्रज केर मोरा सखी रे मैं
ओही बिरज मा बड़े-बड़े बिरछा है
बैठों पंख मुरेरा सखी रे मैं
भइउं न ब्रज केर मोरा सखी रे मैं
अरे झरि झरि पंख गिरें धरती मां
बीनै ब्रज केर लोगा सखी रे मैं
भंइउ न ब्रज केर मोरा सखी रे मैं
उन पंखन केर मकुट बनत है
बांधैं जुगुल किशोरा सखी रे
भइउं न ब्रज केर मोरा सखी रे मैं

 

सदाभवानी दाहिनी / बघेली डग्गा तिनताला गीत

 

सदा भवानी दाहिनी ए साजन हों
अरे सन्मुख गोरि गनेश
पांच देव मिलि रक्षा करैं
कि ब्रम्हा विष्णु महेश
गंगा जी भुलानी अरे हां गंगा जी भुलानी
अरे जटन मां गंगा जी भुलानी
अरे धनि महिमा शिव तोरि
जटन मां गंगा जी भुलानी

 

मछरिया साबुन लै गै धोबिया / बघेली डग्गा तिनताला गीत

 

मछरिया साबुन लै गै धोबिया हालै विहाल
धोबिया धोवै कापड़ा कि झांझ मऊ के घाट
मछरिया साबुन लै गै कि धोबिया हालै विहाल

 

नई आयी गोलिनिया दधि / बघेली डग्गा तिनताला गीत

 

नई आयी गोलिनिया दधि लै ले सलोने श्याम
पत्ता टूटौ डार से कि लै गा पवन उड़ाय
यारी छूटै यार से कि या दुख कहां समाय
नई नई आई गोलिनिया दधि लै ले सलोने श्याम

 

अंटरियै चढ़ि चला हो दरवाजा / बघेली डग्गा तिनताला गीत

 

अंटरियै चढ़ि चला हो दरवाजा मा बोलै मोर
ये प्यारे वा दिन कउन थे जादिन कीन्ह्या प्रीति
दुख दै के न्यरे भया कउन गांव की रीति
अंटरियै चढ़ि चला हो दरवाजा मां बोलै मोर

 

 

अरे पीपर पात सहज डोलै / बघेली डग्गा तिनताला गीत

 

अरे पीपर पात सहज डोलै
बिना छैला के गोरी
बिना छैला के गोरी निहु बोलै
बिना छैला के गौरी

 

खैरा सुपारी लौंग कारी / बघेली डग्गा तिनताला गीत

खैरा सुपारी लौंग कारी
सपनेउ मा सतावइ
सपनेउ मा सतावै तुम्हार यारी
सपनेउ मा सतावै

 

सावन लागो रे मन भावन / बघेली डग्गा तिनताला गीत

 

सावन लागो रे मन भावन
हां हां सावन लागो रे मन भावन
कि काटी दूब हरिआय
विरना लेवउवा अरे आये ना
घर डोली राख्यों सजाय
हुर जहा हा हा

 

 

निदरिया तोही बेची जो / बघेली डग्गा तिनताला गीत

 

निदरिया तोही बेची जो कोउ गाहक होउ
साजन आये लौटि गे काहे ना जगाये मोहि
निदरिया हम लेबइ जो तुम्हें बेचन होय
करा मोल निदरी कै जो तुम्हें बेचन होय

 

बइकल भये कन्हैया हर गे ज्ञान तुम्हार / बघेली डग्गा तिनताला गीत

 

 

बइकल भये कन्हैया हर गे ज्ञान तुम्हार
पिता तुम्हरे कहिगे का लिहा उहिउ का दान
गोपिया हइलि परी जंगल मा हेरे न पावैं पात
कहना पाई पात पतेउवा काहेन चुकाई दान
कन्हई बांधिन चुरुवा लावा भउजी दान
मटकी पे मटकी उलदिन पे नहि चुरुवा अधियान
धौ तोरे पेटे मां कुंआ बावली धौ लगी समुन्द कै सोख
मटकी पे मटकी उलदेन नहि चुरूवा अधियान
ना मोरे पेटे कुंवा बावली ना समुन्द के सोख
कपटन दान चुकाइउ मोर चुरुवा नाहि अधियान

 

सुरति रहे तो सुअना ले गा / बघेली डग्गा तिनताला गीत

 

सुरति रहे तो सुअना ले गा
बोल के अमृत बोल
नटई रहै तो कोइली लै गे
चढ़ि बोलइ लखराम

एतनी देर भय आये रैन न एकौ लाग
कोइली न लेय बसेरा न करन सुआ खहराय

 

 

खबर मोरी लेतै रह्या हो / बघेली डग्गा तिनताला गीत

 

खबर मोरी लेते रह्या हो
अरे लेते रह्या महराज हो
खबर मोरी
खबर मोरी लेते रह्या हो
चाहै नेरे बसाया चाहै दूर हो
खबर मोरी

 

 

ससुर घर नीका लागै हो / बघेली डग्गा तिनताला गीत

 

ससुर घर नीका लागै हो
अरे नीका लागै महराज हो
ससुर घर
नीका लागै हो कि
मोरे मइके के कलश देखायं हो
ससुर घर

जनकपुर नीका लागै हो
अरे नीका लागइ महराज हो
जनकपुर
जनकपुर नीका लागै हो
जहां सीता सहित भगवान हो
जनकपुर

 

एक पेड़ काशी मा जामा हो / बघेली डग्गा तिनताला गीत

 

एक पेड़ काशी मा जामा हो
अरे डार गई जगन्नाथ हो
काशी मा जामा
फूलत फूल द्वारिका मोरे प्यारे
कि फर लाग्यों बद्रीनाथ हो
मटुक वाले

 

अरे लम्बे देशवा महराज हो / बघेली

 

अरे लम्बे देशवा महराज हो
भोलानाथ
अरे लम्बे देशवा रे
मोरी फिटकी नजर नाहि जाय रे
भोला नाथ हो

 

 

राजा करन एक दानी रे उपजा / बघेली डग्गा तिनताला गीत

 

राजा करन एक दानी रे उपजा
करे सभा मा दान हो मां
सोनवा सोनवा सबै कोउ लइगा
कपिला दान नहिं लेइं हो मां
पश्चिम दिशा से एक जोगी आवा
लेय कपिलन का दान हो मां
काहे के खूंटा बंधै बछोलन
सोनेन कपिला गाय हो मां
रूपेन खूंटा बंधे बछोलन
सोनेन कपिला गाय हो मां
ढीलि दे बम्हना मैया हमारी
चरें नन्दन बन जाय हो मां
ढीलि दे बम्हना मैया हमारी
चरें नन्दन बन जाय हो मां
चन्दन विरवा खइचै जो सुरही
शिर पर सिंघ गलारै हो मां
आज सिंह मोही घरैं जाय दे
घर बछुला नरियाय हो मां
जात मेहरिया का पथ नहि मानौ
नहि मानउं विशुवास हो मां
काहू के तै लै ले लाग लगनिया
काहू के साख गवाह हो मां
धरती का लै ले लाग लगनिया
सूरिज का साख गवाह हो मां
रेगि चलीं है सुरही रे गइया
जब घर मुंह सौहान हो मां
औ आने दिन सुरही हुंकुरत आवइ
आज काहे अनमन आई हो मां
ढीलि दे बम्हन मोर बछोलना
बाचा मैं आई हार हो मां
तुम्हारा दूध ना पीबै हो माता
चलब चुम्हारेन साथ हो मां
आंगेन आगे सुरही रेगि चली
पीछे बछोलन जाय हो मां
चन्दन बिरवा सुरही जो खेचिस
शिर ऊपर सिंह गलारै हो मां
आगे मामा हमही भखि लेअ
पाछेन माता हमार हो मां
तुम तौ बोलेउ भैनै बछेरूआ
या बन तुम्हरे आय हो मां
छिटिक चरा तुम भैने बछेरूआ
या बन तुम्हारै आय हो मां

 

 

एतनी देर तोही सुमिर्यों शारदा / बघेली डग्गा तिनताला गीत

 

कहां रही बेलमाय हो मां
कहां रही बेलमाय हो मां
धौ तै बेलमी बाग बगैचा
धौ मलिया फुलवारि हो मां
धौ तोरी बहियां निबल भई माता
धौ बहुंकौ धुन लाग हो मां
धौ तोही जागिस नट ओ बेड़िया
धौ चलि गइसि पताल हो मां
ना मैं बेलम्यों बाग बगैचा
नहि मलियां फुलवारि हो मां
ना माही जागिसि नटा और बेड़िया
ना गड़ि गयउं पताल हो मां
मैं तौ बेलम्यों अपने भवन मां
देत कुमारिन दान हो मां

 

 

भइसासुर की अमिली रे / बघेली डग्गा तिनताला गीत

 

भइसासुर की अमिली रे देव अमिली रे
अरर बरर गई डार देव भइसासुर रे
ऊपर मोतिया करहइं रे करहइं रे
तरे भइसा रखवार देव भइसासुर रे
उयं भइसा ना जान्या रे देव जान्या रे
जउन लादइं तेलिया कलार रे देव भइसासुर रे
बारह भाठी मद पियै रे देव मद पियै रे
सोरहा बकरा खाय रे देव भइसासुर रे
लोहेन के लौह सांकर टोरइं
फारइं बजुर केमार देव भइसासुर रे
भूतन दासन भूतन ओढ़न भूतन करइं अहार
देव भइसासुर रे
भइसासुर रे
भइसासुर की अमिली रे देव अमिली रे
अरर बरर गई डार देव भइसासुर रे

 

 

अरि ये हां राम लंकै गे / बघेली डग्गा तिनताला गीत

 

अरि ये हां राम लंकै गे
अरि ये राम लंकै गे - राम लंका गे दोउ भाई
कहै मदोबरि सुनु पिय रावन - ये हां हां
जेखी तिरिया तै हरि लाये कोपि चढ़े दोउ भाई
राम लंकै गे
मेघ नन्द अस बेटा जेखे कुम्भकरन अस भाई
तिनकी तिरिया का मन डरपै
सात समुद्रौ नौ खाई - राम लंकै गे
अंगद ऐसे सेवक जेखे हनुमान अस जोधा
बरत अगिनि मां उइं धंसि जइहैं
कहा करै तोर भाई राम लंकै गे
राम लंकै गे।

 

फाग रचै बनवारी हो ब्रज मां / बघेली डग्गा तिनताला गीत

 

फाग रचैं बनवारी हो ब्रज मां
फाग रचैं बनवारी
सब देखैं ब्रह्मा विष्णु मुरारी
नन्द बाबा के द्वारे-द्वारे
सब सखी हिंडोला गाड़े
झूला झूलै रंगौ डारइ
मोर भींजई कुसुम रंग सारी
ब्रज मा फाग रचै बनवारी
नन्द बाबा के लाला लाला-लाला लाला
कहैं मरोरे गाला
मोरी चोलिया रंगा बोरे
मोही देहैं ननंद घर गारी
ब्रज मा फाग रचे बनवारी

 

 

बनि आये बनवारी बैदराज / बघेली डग्गा तिनताला गीत

 

बनि आये बनवारी बैदराज
बनि आये बनवारी
खोरेन खोरेन फिरै बैदराज
है कोए: सखि बेमारी
काहे बनि आये बनवारी बैदराज
काहे बनि आये बनवारी
अपने महलि से बोली राधिका
देखा नारी हमारी बैदराज
बनि आये बनवारी
अंगुरी पकड़त बहुका पकड़िन
पकड़िन बाहुं मुरारी
बैदराज बनि आये बनवारी
ई रोगियन मां रोग नहीं है
है रस केर बेमारी
बैदराज बनि आये बनवारी
बैदराज बनि आये बनवारी
बनि आये बनवारी