विवाह गीत (कन्या पक्ष)
कउन सिंह की थेरिया / बघेली विवाह गीत
कउन सिंह की धेरिया की बड़ी-बड़ी अंखियां
ओठवन चुयै ओगार
कउन सिंह के पुतवा कै मउरी सजति है
भंवरी लेत बसेर
एक चिठियाँ लिखि भेजइं हो कउन कुंवरि
दिहा राजा दूलहे के हाथ
तुम्हरे मउरी मां भंवरी बसति है
हमूं जोगिन व्है जाब
एक चिठियां लिखि भेजइं कउन सिंह
दिहा रानी कन्या के हाथ
बन केरी भंवरी बनै उड़ि जइहैं
हमरा तुम्हरा होय विआह
कौन आयं दूलहे कउन दुल्ह भइया
कउन आयं दुलहे के बाप
छोटी मोटी हथिनी संवारी साजी
सोनवा मढ़ाये ओखे दांत
सोनेन हउदा कसाये आवइं
ओई आयं दुलहे के बाप
जमुना के ईरे तीरे घोड़िला कुदावैं
बांधे बैजन्ती रंग पाग
सिर ऊपर कलंगी चमकत आवै
ओई आयं दुलहे के भाइ
छोटी मोटी डड़िया सम्हारी
छोटेन लगे कहार
माथे मौर सिर झमंकत आवइ
औई आयं दुलहे दमाद
एक अमरहियां एक आमा / बघेली विवाह गीत
एक अमरहियां एक आमा पियरै
एक आमा संवरिन पात
एक आमा है मोरे आजा के द्वारे
ओही तरी उतरी बरात
एक आमा है मोर बबुल के द्वारे
ओही तरी उतरी बरात
सोवत रह्यों मैं माया के कोरवा
भोर भण्उ भिनसार
केखे दुआरे बाजन बाजै केखर होय बिआह
तुहीं बेटी एगल तुम्हीं बेटी गेगल
तुम्हीं बेटी चतुर सुजान
केखे दुआरे बाजन बाजै केखर होय बिआह
सिखै न पायों गुन गिहथैया
तपै न पायों रसोय
सांस ननंद मिलि भइया गरिअइहैं
मोसे सही न जाय
सिख ले बेटी गुन गिहथैया
तपि ले महरी रसोय
सासु ननंद मिलि भइया गरिअइहैं
लै लिहा अंचल पसार
तसुवा मने करा ढोलिया मने करा
सहनइयां के शब्द नेवारि
पंडित विप्र तुम बेद मने करा
मोर धिया रहिहैं कुंवारि
खम्भा उलठि व्है के बोले दुलेरूआ
सुना धन विनती हमार
तसवा न मने करा ढोलया न मने करा
पंडित विप्र तुम बेद सुनावा
अब धिया होई बिआह
सुरिज देउत के सखिया भरत हौं
खेइहों मैं नइया तुम्हार
बखरी तो भली बनवाया / बघेली विवाह गीत
बखरी तो भली बनवाया हो कउन सिंह
सुरिजन मुंहे का दुआर
ओही व्है के निकरी हैं बेटी को कउन कुंवरि
गोरे बदन कुम्हिलायं
कहा तो मोरी बेटी छत्र तनाई
कहा तो सुरिज अलोप
काहे का मोरे दाऊ छत्र तनइहा
काहे का सुरिज अलोप
आजि कै राति दाऊ तुम्हरे मड़ये तरी
काल्हि विदेशिया के हाथ
काहे का सेयों हरदी का बिरवा / बघेली विवाह गीत
काहे का सेयों हरदी का बिरवा
काहे का मैन मजीठ
काहे का सेयों धेरिया कउन कुंवरि
कच्चे दूध पिआय
पिअरी का सेयों हरदी का बिरवा
चुनरी का मैन मजीठ
धरम का सेयों धेरिया कवन कुंवरि
कच्चे दूध पिआय
खोरवन दुधवा कटोरवन पानी
आजी ओखी लीन्हें ठाढ़
एक नन्चू दुधवा पिया मोरी नातिन
फेर चौके मा जाव
तब नहि दुधवा पिआया मोरी आजी
जब रह्यों बारि कुंवारि
अब कैसे दुधवा पिओं मोरी आजी
ठाढ़ विदेशिया दुआर
खोरवन दुधवा कटोरवन पानी
माया ओखी लीन्हें ठाढ़
एक नन्चू दुधवा पिआ मोरी बेटी
तब चौके मा जाउ
तब नहि दुधवा पिआया मोरी माया
जब रह्यों बारि कुंवारि
अब कैसे दुधवा पिओं मोरी माया
जब ठाढ़ विदेशिया दुआर
जैसे सेघौरी मां सेन्दुर / बघेली विवाह गीत
जैसे सेधौरी मां सेन्दुर झलकै जैसे गंगा जल पानि
तैसे झलक दै के निकरी लड़ेलिदेई चौके मां बैठी आय
काहे बेटी अनमन काहे बेटी उनमन काहे बेटी बदन मलीन
मैं तोसे पूछौ बेटी तोर सोनवा मलीन धौ रुपवा है खोट
ना माया मोर सोनवा धूमिल ना रूपवा है खोट
हम धन गोर पिया मोर सांवर ये गुन बदन मलीन
सांवर सांवर ना करा बेटी सांवर है भगवान
संवरे कन्हैया मुख मुरली बजावै मोहि रहे संसार
माया के कोख कुम्हार के आंवा कोउ करिया कोउ गोर
विवाह गीत (वर पक्ष)
बेगि करा तैयार बनरा / बघेली विवाह गीत
बेगि करा तैयार बनरा को बेलमायों रे
आजी ने बेलमायों बनरा आजी अंग लगायों रे
जल्दी करा तैयार बनरा को बेलमायों रे
अम्मा ने बेलमायों बनरा दाऊ अंग लगायों रे
जल्दी करा तैयार बनरा को बेलमायों रे
काकी ने बेलमायों बनरा काकी अंग लगायों रे
जल्दी करा तैयार बनरा को बेलमायों रे
भौजी ने बेलमायों बनरा भैया अंग लगायो रे
बेगि करा तैयार बनरा को बेलमायों रे।
आजु बना हैं बनरी के नगर मा / बघेली विवाह गीत
आजु बना है बनरी के नगर मां
मौरी संवारै बना अपने नगर मां
कलंगी संवारै बनरी के नगर मां
कुन्डल संवारै बना अपने नगर मां
फेनिया सवारै बनरी के नगर मां
आजु बना है बनरी के नगर मां
कन्ठा संवारै बना अपने नगर मां
सेल्ही सवारै बनरी के नगर मां
आजु बना है बनरी के नगर मां
जामा संवारै बना अपने नगर मां
फेन्टा संवारै बनरी के नगर मां
आजु बना है बनरी के नगर मां
कंगन संवारै बना अपने नगर मां
चूड़ा संवारै बनरी के नगर मां
आजु बना है बनरी के नगर मां
राजा बना बेगि चले आवा / बघेली विवाह गीत
राजा बना बेगि चले आवा तुम्हैं बिना अच्छा न लागैं
राजा बना अपने बव्बा के प्यारे
आजिउ के प्रान अधार-चला सखी देखन चलिये
राजा बना बेगि चले आवा
तुम्हैं बिन अच्छा न लागइ
राजा बना अपने दाऊ के प्यारे
मम्मा के प्रान अधार-चला सखी देखन चलिये
राजा बना बेगि चले आवा
तुम्हैं बिना अच्छा न लागइ
राजा बना अपने कक्का के प्यारे
काकिउ के प्रान अधार-चला सखी देखन चलिये
राजा बना बेगि चले आवा
तुम्हैं बिना अच्छा न लागइ
राजा बना अपने भइया के प्यारे
भाभिउ के प्रान अधार-चला सखी देखन चलिये
राजा बना बेगि चले आवा
तुम्हैं बिना अच्छा न लागइ
पान का पठयों दुलहे दुलेरूआ / बघेली विवाह गीत
पान का पठयों दुलहे दुलेरूआ कहना रह्याउ वेलमाय
की बेलम्या तुम राजा दरवरिया की बेलम्या ससुरार
ना हम बेलमेन राजा दरवरिया ना बेलमेन ससुरार
हम तो बेलमेन आजा बगैचा कोइली गहागह लेय
हम तो बेलमेन पिता के बगैचा जहां कोइली गहागह लेय
हम तो बेलमेन काका के बगैचा जहां कोइली गहागय लेय
हाथ कै हिरौधी मैं तोही देहों फंसिया कोइली पकरि लै आव
डर डर बउड़े फंसिया बेटउना पत पत कोइली लुकाय
कोइली पकरि के जंघ बैठाइन पूछैं कोइलिया से बात
काहे मंढाऊं तौर अंखना रे पखना काहे मढ़ाऊ तोर चोच
रूपवा मढ़ावा मोरे अखना रे पखना सोनवा मढ़ावा मोरी चोच
बनरा के सिर सेहरा / बघेली विवाह गीत
बनरा के सिर सेहरा मोतियन से गुहे हैं
आवा हो मालिन बैठा दुलैचा
करा मौरी कैर मोल हो - मोतियन से गुहे हैं
बनरा के सिर सेहरा हो मोतियन से गुहे हैं
नौ लख बाबा मोल किहिन हो
दस लाख अम्मा दीन हो - मोतियन से गुहे हैं
बनरा के सिर सेहरा हो मोतियन से गुहे हैं
मौरी बांधे दूलहे कउन सिंह
बांधि ससुररिये जांय हो मोतियन से गुहे हैं
वा ससुररिया कै सांकर गलिया
अरझ मौरिया कै झोप हो - मोतियन से गुहे हैं
बनरी बिआहि बना घर आये
झुकि झुकि करत सलाम हो - मोतियन से गुहे हैं
बनरा के सिर सेहरा हो मोतियन से गुहे हैं
टिप्पणियाँ
एक टिप्पणी भेजें