भारे भेलै हे पिया, भिनसरबा भेलै हे / मैथिली लोकगीत
भारे भेलै हे पिया, भिनसरबा भेलै हे
उठू ने पलंगिया तेजि, केाइलिया बोलै हे
उठबे करबै गे धनी, हम उठबे करबै के
दही ने मुरेठबा, हम कलकतबा जेबै गे
कलकतबा जयबऽ हे पिया, कलकतबा जयबऽ हे
हम बाबा के बजाइये कऽ, नैहरबा जयबऽ हे
नैहरबा जेबही गे धनी, नैहरबा जेबही गे
जतबा लागल-ए रुपैया, धैये दहिन गे
धैये जयबऽ हे पिया, हम धैये जयबऽ हे
जेहने एलिऐ बाबा घर सऽ, बनाइये देबौ गे
हम मोतीचूर के लडुआ खुआइये देबौ के
नहिये बनबै हे पिया, हम नहिये बनबै हे
जेहन एलिऐ बाबा घर सऽ, नहिये बनबै हे
हमरो बलुम जी के नामी-नामी केश छनि / मैथिली लोकगीत
हमरो बलुम जी के नामी-नामी केश छनि
से जुलुम करै ना
ना रे अँउठिया केशबा, जुलुम करै ना
हमरो बलमु जी के बड़ी-बड़ी अँखिया
से जुलुम करै ना
ना रे, मारै तिरछी रे नजरिया, जुलुम करै ना
हमरो बलमु जी के पातर-छितर ठोर छनि
से जुलुम करै ना
ना रे, छोड़ै मुसकी रसिकबा, जुलुम करै ना
हमरो बलमु जी के सँइतल जीह छनि
से मन भाबै ना
आरे उतरहिं राज सओं अयलै एक नटिनियां रे जान / मैथिली लोकगीत
आरे उतरहिं राज सओं अयलै एक नटिनियां रे जान
जान बैसि रे गेलै कदम बिरिछिया रे जान
आरे झिहिर-झिहिर बहलै शीतल बसतिया रे जान
जान घर सओं बहार भेलै सुनरी एक पुतहुआ रे जान
आरे झारय रे लगलै नामी-नामी केसिया रे जान
जान पड़ि रे गेलै नटिन के नजरिया रे जान
आरे मचिया बैसल सासू बरैतिन रे जान
जान दियौ सासू कोसल रुपैया रे जान
अइया खौखी भइया खौकी सुनरी पुतहुआ रे जान
जान कहां रे लयबै कोसल रुपैया रे जान
आरे कहाँ गेल कीये भेल सुनरी पुतहुआ रे जान
जान कौने सुन्नरि गोदना गोदेतै रे जान
आरे सबके रे तिरिया अम्मा अपने दुअरबे रे जान
जान हमरो तिरिया कहाँ चलि गेलै रे जान
आरे तोहरो तिरिया गोदना गोदाओल रे जान
जान चलि रे गेलै नटिन सिरिकिया रे जान
आरे दीअ अम्मा दीअ सेर एक सतुआ रे जान
जान हम जायब धनिक उदेसबा रे जान
आरे एक कोस गेली पियबा, दुई कोस गेलै रे जान
जान तेसरेमे नटिन सिरिकिया रे जान
आरे गोदना गोदौनी नटिनियाँ कीये लेबै दनमा रे जान
जान कीये रे लेबही दनमा बर्काससबा रे जान
आरे अइया खौकी भइया खौकी सुनरी पुतहुआ रे जान
जान लेबौ रे सासुक कोसल रुपैया रे जान
आरे गोदना गोदौनी नटिन गे कान दुनू सोनमा रे जान
जान आरो रे देबौ गनती मोहरबा रे जान
सीकी के दउरिया लच-लच लचकै गे मैना / मैथिली लोकगीत
सीकी के दउरिया लच-लच लचकै गे मैना
मैना गे आबि गेलै हजमा लेओनमे गे मैना
हजमा के संग हम नञि जेबै रे मैना
मैना रे राहे-बाटे लहछू करेतै रे मैना
सीकी के दउरिया लच-लच लचकै गे मैना
मैना गे आबि गेलै ससुर जी लेओनमे गे मैना
ससुर जी के संग हम नञि जेबै रे मैना
मैना रे राहे-बाटे घोघबा तनौतै रे मैना
सीकी के दउरिया लच-लच लचकै गे मैना
मैना के आबि गेलै देओर जी लेओनमे गे मैना
देओर जी के संग हम नञि जेबै रे मैना
मैना रे राहे-बाटे हँसिया लगौतै रे मैना
सीकी के दउरिया लच-लच लचकै गे मैना
मैना गे आबि गेलै स्वामीजी लेओनमे गे मैना
स्वामीजी के संग हम चलि जेबै रे मैना
मैना रे राहे-बाटे फुसूर फुसूर बतिअयबै रे मैना
हे नारिकेर केर गछिया / मैथिली लोकगीत
हे नारिकेर केर गछिया
कहमा लगयलौं जूही-चमेली
कहमा लगयलौं अनार हे
हे नारिकेर केर गछिया
दुअरे लगयलौं जूही-चमेली
अंगने लगयलौं अनार हे
हे नारिकेर केर गछिया
कय फूल फूलै जूही-चमेली
कय फूल फूलै अनार हे
हे नारिकेर केर गछिया
दस फूल फूलै जूही-चमेली
दुइ फूल फूलै अनार हे
हे नारिकेर केर गछिया
केये फूल सुँघलनि जूही-चमेली
केये चिखलनि अनार हे
हे नारिकेर केर गछिया
देओर सुँघलनि चूही-चमेली
पिया रसीला अनार हे
हे नारिकेर केर गछिया
टिप्पणियाँ
एक टिप्पणी भेजें