हिंडौले के गीत बघेली लोकगीत Hindole ke Geet Lokgeet Bagheli Lyrics

 उड़ि जातिउ सोना चिरैया / बघेली हिंडौले गीत

उड़ि जातिउ सोना चिरैया ननंद मोरी

उड़ि जातिउ सोना चिरैया

अपने ननंदी का बेसर बनवाय देबइ

झुलनी लयउबै बड़ी बांकी

ननंद मोरी उड़ि जातिउ सोना चिरैया ननंद मोरी

अपने ननंदी का कंगना बनवाय देबइ

पहुंची लयउबै बड़ी बांकी - ननंद मोरी उड़ि जातिउ सोना चिरैया

अपने ननंदी का बहुंटा बनवाय देबइ

बाजू लयउबै बड़ी बांकी ननंद मोरी

उड़ि जातिउ सोना चिरैया ननंद मोरी

अपने ननंदी का चुरवा बनवाय देबइ

जेहरी लयउबै बड़ी बांकी ननंद मोरी

उड़ि जातिउ सोना चिरैया

ननंद मोरी उड़ि जातिउ सोना चिरैया

ननंद मोरी

बरा तरी झूलनि मैं गयउं / बघेली हिंडौले गीत

बरा तरी झूलनि मैं गयउं कि मोरिउ गई जेठानी

दुइ दुन्नों रंगित लाल दुइ दुन्नों मैन मजीठ

दुइ दुन्नों अम्मा घउद लगे

झूलि झालि जब घर का बहुरेन

दुअरा मां सुरही गाय

गाय गोसाईं तोरे पइयां लागौं

एक नन्चू सींग सकेल

दुइ दुन्नों रंगित लाल दुइ दुन्नों मैन मजीठ

दुइ दुन्नों अम्मा घउद लगे

झूलि झालि जब घर लउटिउं

दुअरा मा ससुरू के सेजि

ससुर गोसाईं तोरी पइंयां लागउं

एक नन्चू सेज सकेलि लेउ

दुइ दुन्नों रंगिल लाल दुइ दुन्नों मैन मजीठ

दुइ दुन्नों अम्मा घउद लदे

झूलि झूलि जब घर का बहुरेन

दुअरा मा सेठजी के सेज

जेठ गोसाईं तोरी पइंया लागौं

एक नन्चू सेज सकेलि लेइ

दुइ दुन्नों रंगित लाला दुइ दुन्नों मैन मजीठ

दुइ दुन्नों अम्मा घउद लगे

झूलि झूलि जब घर का लौटेन

दुअरा मा पति जी कै सेज

पति देव मोरे मैं तोरे पइयां लागौं

एक नन्चू सेजिया सकेल लेव

दुइ दूनौ रंगित लाला दुइ दुनौ मैन मजीठ

दुइ दूनौ अम्मा झूमरिया

बरा तरी झूलनि मैं गयउं कि मोरी गई जेठानी

दुइ दुनौ रंगित लाला दुइ दूनौ मेन मजीठ

दुइ दूनौ अम्मा झूमरिया

लै ले चहचिन्दा दै दे जवा / बघेली हिंडौले गीत

लै ले चहचिन्दा दै दे जवा

हम घरे जईं घरे बालक रोवै

अरे उइं चिहचिन्दा का एड़ के चीरेन बेड़ के चीरेन

निकरा हरिअरा बांस हो

ओही बांस के अड़ी बनायन छड़ी बनायन

गौवा बहोरन जांव हो

ओइड़े गोइड़े गौवा बगरि गई

भइंसि बगरि गई ताल हो

ओही ताल मां इनकी चाउर किनकी चाउर

गोली भइसि का दूध हो

अपने भइया का अस के खवाइउं अस के पियाइउं

हंसत खेलत घर जाइं हो

अपने देवर का अस के खवउवै अस के पियउबै

कांखत कराहत जाइं हो

जउन घाट मोरे भइया नहाने केमला का फूल उतराइ हो

जउन घाट मोर देवरा नहाने

सुउरी डबरा लेइ हो

जीने महलि मोरे भइया जी रेंगइ

राजा जोहारत जाइं हो

जउन गइलि मोर देवरा जी रेगइं

धोबिया जोहारत जाइं हो

डोरी डार दे महल चढ़ि आवै / बघेली हिंडौले गीत

डोरी डार दे महल चढ़ आवै रसिया

डोरी डार दे

जब के रसिया गोइड़वा मां आई

बाढ़ि उठीं बैरिन नदिया - डोरी डार दे

डोरी डार दे महलि चढ़ि आवइं रसिया

जब के रसिया दुअरवा मां आई

भूंकि उठि बैरिन कुतिया - डोरी डार दे

डोरी डार दे महलि चढ़ि आवइं रसिया

जब कै रसिया बरोठवां मां आई

धाइ परीं महतारी बिटिया - डोरी डार दे

डोरी डार दे महलि चढ़ि आवइं रसिया

जब कै रसिया अंगन बिच आई

मारि दिहिनि बैरिनि बिछिया - डोरी डार दे

डोरी डार दे महलि चढ़ि आवइं रसिया

जब कै रसिया सेजरिया मां आई

टूटि परीं बैरिनि खटिया - डोरी डार दे

डोरी डार दे महलि चढ़ि आवइं रसिया

डोरी डार दे